望穿秋水，恒指噚日終於破24000大關，可惜唔夠幾分鐘，就已經得而復失，埋單更加要倒跌收場，純技術分析睇，噚日嘅走勢絕對可以用肉酸嚟形容。不過，大關當前，要成功衝穿唔係一朝一夕嘅事，戰友們唔使咁快氣餒。
大市向好，中大價股走勢亦有板有眼，海螺水泥（914）31蚊目標價噚日順利到達，中滔環保（1363）更加係超標完成。至於噚日推介嘅創維（751），最多升半成後倒跌，原因只得一個︰嚴重超買！始終已經升咗兩棍，唞一唞氣亦屬正常，基本因素不變下，繼續向坐五望六目標進發。
今日推介華能新能源（958），貪佢食正國策之餘，業績靚仔兼冇蟹貨。北京霧霾天氣遲遲未解決，阿爺終要採取行政手段，講明如問題未解決，春節期間將停售煙花爆竹，可見再生能源地位日益重要，作為華能集團嘅風電旗艦，華能新能源肯定係栽培重點。首九個月發電量按年增長49.9%，表現可人，中期盈利6.5億銀人仔，勁升1.6倍，較去年全年5.6億銀人仔還要高，盈喜幾成事實。
華能新能源噚日收報3.40元，升1.8%，已接連創出上市新高，冇蟹貨下阻力自然小，戰友可候回試3.2至3.3元吸納，中線有望見4元。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange