市民覺得立法會家嘈屋閉，不無原因。噚日范國威同元秋蔣麗芸，就喺立法會會議廳外，好似小學雞咁互相指罵甚至推撞。事緣元秋聽到「傳聞」後竟老屈咖喱范係煙民，仲諉過傳媒唔查證；而咖喱范竟為此小事，自製山草藥道具，高調喺傳媒前向元秋送大禮，結果元秋大鬧對方係抽水王，咖喱范則話元秋噏得就噏，呢場口水戰成為立法會噚日焦點。
噚日有報章引述身為煙鏟嘅元秋，爆料話聽聞咖喱范都係煙民。咖喱范一早睇到報道眼火爆，堅稱自己唔係煙民，仲火速整咗個巨型道具山草藥包，寫住「元秋堂」出品，仲趁元秋入會議廳前，喺一排鏡頭前向對方送禮，批評元秋老屈。
爭持不下互相推撞
受狙擊嘅元秋㷫爆，自然用著名獅吼功反擊，即時反問對方「講完未？」佢話自己係聽「有議員」話喺立法會運動室入面見到咖喱范食煙，又指控范係「抽水王」，兩人繼而爭持不下，其間元秋不斷推咖喱范，叫佢回答係咪有食煙，咖喱范就係咁叫對方唔好推佢，互罵聲浪之高驚動全立法會，旁邊幾位立法會保安都睇到目瞪口呆，可憐包山草藥，最終被遺棄喺會議廳外嘅地上。
元秋其後堅稱，自己係聽到工聯會陳婉嫻助理話咖喱范食煙，無端端捲入漩渦嘅嫻姐就話冇見過，一場鬧劇就此落幕。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange