「問題天天都多」係《櫻桃小丸子》嘅主題曲，相信完全符合阿仙奴領隊雲格呢一刻嘅心聲，皆因最近隊中兩名球員都正值「反叛期」。
今季回巢嘅防中法米尼歸隊後頗有建樹，連名宿柏奴亞都話其可靠表現令奧斯爾同辛迪卡索拉可以專心進攻，無疑係球隊嘅無名英雄。不過呢名法國中場周二對馬賽時，又偷偷剪短自己波衫衫袖（圖），今次連雲格都黑面兼有微言。上次法米尼已經神經質剪短衫袖，而同67歲球會職員起衝突，為咗衫袖連老都唔敬！原來比賽當日係由隊長決定着長袖定短袖，連梅迪薩卡嘅「隊旨」都敢違，認真唔畀面。
不過講叛逆，點都唔及近日涉嫌刑事毀壞嘅賓特拿，一向麻煩多多嘅丹麥前鋒同友人凌晨1點走去游夜水，會所泳池又唔係你屋企，唔係天真到大門隨時為你而開呀？結果球星又撬鎖又打爛窗玻璃，最後被控刑事毀壞。但故事仲未完結，鄰居事後爆料，指當晚探頭了解情況時，其中賓特拿一行人中有人威脅：「咪嘈！小心我強姦你老婆！」嘩，世風日下，雖然事主話唔肯定係咪出自「中堅賓」口中，不過聽得出唔係純正英國口音喎。
雖然男人唔壞，女人唔愛，但以兩位相貌絕對係名單以外；相信兩位再咁標奇立異，好快都會喺雲格嘅名單之外。
文：呂晨
以女性角度看球星新聞，唔用眉筆用原子筆寫低球壇百態！
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24