明年明星賽嘅網上投票，11月已經開始，講真呢幾年明星賽都悶悶哋，作為明星周末派對重頭戲嘅入樽大賽，已經冇大牌球星參加，近兩年拎冠軍嘅真係連名都講唔出。到重頭戲，勒邦占士、獲迪、拜恩都熟口熟面，冇奧尼爾呢個笑彈又真係悶啲，小弟決定用手上一票，搵啲新鮮人入圍。
西岸前場人選，大熱都離唔開杜蘭特、懷特侯活同比歷克格芬，但要揀新人，我就支持木狼中鋒比高域。講真比高域嘅外表就唔多討好，濃密嘅鬍鬚加上粗壯嘅手臂，係荷李活電影常見嘅屠夫或者變態殺手造型，確實佢都幾有殺氣，接近300磅肉盾，呢種傳統中鋒真係買少見少。木狼雖然整體戰績仲浮沉緊，但佢啲打法幾有觀眾緣，路夫好大機會入明星賽，如果連比高域同盧比奧一對歐洲兵都入埋，真係一時佳話。
東岸方面，熱火孖寶同安東尼幾乎冇走雞，以前朗度都係東岸PG鐵膽，但今季仲未復出，球隊戰績亦下滑，另一明星級PG迪朗仲衰。如果鍾意冷門選擇，小弟希望山貓嘅K獲加有得入。山貓以往同爛隊等死無分別，經過MJ慢慢執，今季有番啲睇頭，要爭標當然冇咩希望，入季後賽就唔係冇機。23歲仔嘅K獲加慢慢打起，無錯佢嘅命中率平平，但切入威力好強，拎過NCAA嘅MOP，山貓要冒起一定要靠佢。文：牽牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange