臨近年尾，幾個發展商積極推售新盤，市場又受落，令到樓市氣氛突然熱鬧起來，就連投資者都出動掃貨。正當市場焦點落喺幾個新盤之際，羅鷹石家族成員或有關人士，就趁機會吸納豪宅貨。
嘉里建設（683）以發展豪宅見稱，喺跑馬地嘅紀雲峰，新近有個高層C及D室相連戶，獲買家以8,830.1萬元買入。根據土地註冊處資料，買家登記係羅鷹瑞（Lo Ying Sui），跟鷹君（041）家族成員、非執董羅鷹瑞同姓名。唔通羅氏家族都睇好樓市，入貨支持「糖王」郭鶴年家族嘅出品？
講開郭氏家族，家族成員周不時買番嘉里樓捧自己場，好似郭鶴年長子郭孔丞早幾月就買入嘉里旗下土瓜灣港圖灣一個單位，佢胞姐郭綺光舊年8月就買入紀雲峰一個過千呎單位。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange