呢幾日港股繼續處於整固嘅階段，無乜利好消息刺激下，好淡雙方都按兵不動，噚日全日波幅都唔夠100點，成交亦唔夠700億元。
上星期氣勢如虹的港交所（388）都喺140元前止咗步，呢幾日都回番少少，昨收136.2元。
大摩料金飾股難再上
個市鬼咁靜，搞到平時炒股仔嘅師奶都無晒癮，仲要轉移戰場，走去血拼「一田」！唔使等到啲Yen跌到直逼7算，更加唔使飛去日本，成班師奶、後生仔女，準備好全副武裝，見到嘢就搶住買，爭到件貨後，排隊畀錢又打晒「蛇餅」，簡直戰鬥力弱啲都戰敗而回。
老實講，部份精選貨品的確係平好多，但係其實好多貨嘅價錢，根本就同平時差唔多。只係「一田」捉摸到消費者唔執輸、唔理三七廿一，乜都買番去先算嘅心態，「激安」策略成功令生意額激增。
就正如今年4月份，金價曾經暴瀉，成班中國大媽蜂擁來港搶金，金飾股龍頭周大福（1929）噚日收市後公佈中期成績表，靚到不得了，激賺九成兼豪派股息。之不過，該股過去幾個月已累升咁多，收市前已見「散水潮」。
大摩噚日都一早發出報告，將三隻金飾股，周大福、周生生（116）、六福（590）劃一給予大市同步評級，建議「趁高沽貨」。預計高基數效應下，明年增長將放緩，股價亦反映利好因素，短期想大升都難，金飾股需要唞一唞了。
瑪姬兒
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24