人仔生意係本港金融業火車頭，難怪恒生（011）第二隻人民幣交易所買賣基金（ETF，83128/3128）噚日掛牌，銀行高層空群而出，一齊出席上市儀式，並由恒生一姐李慧敏親敲銅鑼。
恒生舊年掛牌嘅黃金ETF，係佢哋首隻人仔ETF；呢次則係首趟以人民幣合格境外機構投資者（RQFII）打包，追蹤A股行業龍頭指數嘅人仔ETF產品。
恒生高層除咗玫瑰姐（李慧敏洋名Rose）壓陣外，執行董事馮孝忠、零售銀行阿頭陳力生、企銀主管林燕勝、恒指服務關永盛，同負責呢單project嘅主管李佩珊，全部都以四萬笑容出席。
上市不忘行善，恒生捐出100萬元畀公益金攞到靚冧巴，善款由身兼恒生獨董嘅公益金籌募委員會聯席主席陳祖澤接收，所以噚日交易所展覽廳真係充滿恒生人。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange