煙癮來了怎麼辦？若然冇得即時食番支煙，睇怕唔少煙民都痛不欲生。話說𠵱家立法會內都有四位煲煙黨；社民連長毛同民建聯黃定光係資深煙民就人盡皆知啦，但原來代表中華總商會嘅大律師廖長江以及民建聯元秋蔣麗芸，都係吞雲吐霧一族嚟㗎，八方聽聞，元秋煙癮若然大發，會叫司機車佢去分域碼頭匿埋「偷食」，唔想畀人一個「煙鏟」形象。
元秋：食少咗好多嘞
雖然長毛同黃定光政見唔同，但佢呢兩位性情中人，成日都一齊喺立法會外嘅垃圾桶圍住「打邊爐」，邊煲煙邊吹水，不知幾疏乎。至於廖長江，自從試過俾傳媒影到佢喺立法會外食煙之後，自此唔再張揚地公開暢快「呼吸」，反而會過一條馬路，去立法會對面嘅中信大廈外，一處有綠樹遮蔭、較隱蔽嘅地方，孤伶伶食孤獨煙。
但論到低調呼吸，非元秋莫屬。有人爆料話，元秋為免食煙會影響形象，每次要「上電」時，都會勞師動眾，叫司機車佢去立法會附近嘅分域碼頭，偷偷享受煙霧瀰漫嘅歡愉，因此就算佢煙癮好大，都甚少俾議員見過佢擔住支煙嘅豪邁相。八方問過元秋，乜咁慘要匿喺私竇偷食？佢話自己雖然係煙民，但都係social smoker箒，話近年室內禁煙，自己比起以前那些年已經食少咗好多嘞。點解有人見到佢喺分域碼頭獨自偷歡？佢話可能嗰次咁啱俾人見到箒。查實元秋同廖長江，下次可以約埋一齊慢慢煲吖。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange