噚日講咗費托，今日就要講佢喺車仔嘅領隊摩連奴（圖）。喺日前，摩佬以一個同費托有9成相似嘅平頭裝現身歐聯記者會，原來係佢問費托攞架生，同自己剪嘅。不過，剪咗之後喺返入屋企前，佢就好識得尊重太太麥蒂迪，先將自己個新look用手機電傳畀麥蒂迪過目，問佢ok唔ok先！
真係抵我一向都咁欣賞摩佬，雖然有人話佢寸，但只要寸得起，又有乜嘢問題呢？最怕係冇料扮代表啫。摩佬喺球場行軍及調兵遣將上，都已顯示出自己嘅實力，以實力服人；就連同樣以寸見稱嘅瑞典前鋒伊巴謙莫域，都話願意同佢賣命！另外，亦欣賞摩佬夠長情，喺2001年一手提攜嘅助手費利亞（Rui Faria），兩人𠵱家仲係合作無間；而佢同麥蒂迪更加係青梅竹馬，外型瀟洒嘅摩佬懶理外界話麥蒂迪唔靚及好惡，兩人到𠵱家都咁恩愛。
記住，千祈咪笑人怕老婆，因為球壇兩個怕老婆嘅人辨摩連奴同埋法國球王施丹，都係成功男士嘅典範，可能真係怕老婆會發達！文：吾中
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24