梁振英說，特首候選人要愛國愛港，天經地義。
天經地義，講到宇宙洪荒，盤古初開，理所當然；但真相是，《基本法》無寫話「愛國愛港」，一項無寫的條件突然變成「天經地義」，就像同你講，買新樓要硬食「特大窗台三尖八角貴到無倫」，「天經地義」，預咗啦；讀幼稚園就要參加五萬銀的美國遊學團學英文，天經地義；做壹傳媒就預咗做黑名單被人封殺，天經地義……我會問佢，你本咩「天經」？係咪神經？定係月經？
天經地義，其實即係唔使講道理，唔使講原因；通常係法律解決不了的問題，便會訴諸「習慣」、「常識」，所謂「普世價值」。例如法例無寫明，駁嘴駁舌唔肯畀阿媽家用要坐監，這時我們便會訴諸傳統價值觀：「孝順父母天經地義！」
梁振英也知道「愛國愛港」根本不是甚麼法律字眼，沒有任何一點的法律效力，所以惟有搬出情感用語「天經地義」。這種偷換概念好危險，本來理性的問題，變成情感宣泄，譬如遊行示威究竟有無犯法，本來是講究證據，但近年卻變為「情感用語」。
例如政府說：「破壞社會秩序係不得人心，廣大香港市民係唔會接受，亦唔會答應㗎。」咁即係點啊？不得人心的事情不一定觸犯法例，你面目可憎評價負分不得人心，但唔代表我哋可以報警拉你囉。賤格係唔犯法㗎嘛。
「廣大市民唔會接受」，但市民又不是法官，不接受也不代表遊行是犯法的。
如果你夾硬屈特首要「愛國愛港」，反正基本法無寫明，我們可否自行添加，「做特首要支持平反六四/不能有僭建/拒絕廿三條，天經地義」。仲有，普選係「無篩選」，亦係天經地義！