上個禮拜，各方好友同粉絲，紛紛打電話或者WhatsApp我，話隻馬仕達（8146）嚇死佢哋，之後又大波幅咁上上落落！
首先，一年後嘅馬仕達，「貨已乾，等亮光」，三日波動對比一年收貨，濕濕碎啦，正如日本股神是川銀藏講過嘅烏龜三原則，耐性係無比重要，記多句Prof J口號：「價跌量不增，震倉才安心」，收到未先？
佳景澳門概念強
鏡頭一轉，講番一隻我喺Now仔講過嘅股——佳景集團（703），大家都知Prof J以拆解財技見稱，難得喺Now仔唔插佢，仲讚佢，全因以下幾件事，令我有所改觀！
第一，佳景收購咗澳門英記，將澳門概念發揮得完美無瑕！
第二，佳景搵嚟我哋嘅長青樹校長——譚詠麟做代言人！大佬，阿倫一出，誰能代替佢地位！
最重要嘅就係，校長嘅代言人條件，除咗表演費之外，公司仲醒咗500萬個期權畀校長，行使價3.07蚊，為期5年。消息一出，股價毫無反應，Prof J即刻諗起是川大人嘅烏龜三原則：耐性啊，老友！
你諗吓，阿倫唱半場左麟右李都袋成50萬啦，唱得累，又有克勤頂埋落去，但佢老人家都係一樣收咁多！
消息一出，埋單先得嗰少少，你估譚校長儍嘅咩！之後，大家再追蹤吓隻股，而家已經企穩3.79蚊左右，譚校長賬面差唔賺多360萬，所以炒股係需要非一般嘅思維同耐性！
你問我點睇，4.17蚊係終極目標，破咗唔跌，即刻做兔仔，即係衝入去，跌破咗，睇Prof J繼續追蹤啦！
徐燦傑
中國銀河國際財富管理主管
本欄逢周三刊出
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24