今年是H股來港上市20周年，正當中港兩地嘅財金巨頭準備明晚喺北京筵開10席賀一賀佢，新加坡竟然宣佈準備搶生意，積極吸納內地企業去新加坡上市，當年成功引入H股嘅「股壇教父」李業廣可能要幫口硬銷香港喎。
港交所（388）早於今年8月在港舉行敲鑼儀式慶祝，明晚將會喺北京再搞一場，喺金融街威斯汀大酒店筵開10席，邀請大約100人食晚飯，當年有份參與制定H股遊戲規則嘅中港兩地巨頭難得聚首，場面必定星光熠熠。
香港方面，聯交所前主席李業廣、港交所主席周松崗、港交所行政總裁李小加都會到，可惜，當年同李業廣並肩作戰嘅港交所前行政總裁周文耀、證監會前主席梁定邦因事未能抽空上京。
中方喺自己主場就比較容易預時間出席，83歲嘅中證監首任主席劉鴻儒係座上客，前中投副總經理汪建熙、中國證券金融公司總經理聶慶平，仲有8月冇來港嘅中證監前高層高西慶已經應承現身。
除兩地財金巨頭，有份參與H股上市嘅投行賓架、律師、核數師全部都會派高層代表出席，德銀蔡洪平、美銀蔡紅軍等經常到內地搵生意嘅賓架，當然唔會放過呢個聯誼機會。
雖然李小加好着緊鋪路畀阿里巴巴呢類新經濟型企業來港上市，但係都唔能夠顧此失彼，畀新加坡有機可乘走來搶生意，希望佢都好好利用機會啦。
李華華
mailto:[email protected]
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24