今日推介豪特保健（6880）有三大賣點︰業績見底、現金豐厚以及圖表靚絕，配合多角度炒作概念，預期可上演一幕醜股大翻身。
先講新鮮滾熱辣嘅業績，截至9月底止中期盈利537.2萬銀，按年增長11%，但與去年度下半年虧損278.7萬銀比較，絕對可用脫胎換骨嚟形容。集團主打自家品牌OTO按摩產品，期內中港澳銷售全線錄得增長，中國分部溢利更大增2.4倍。豪特亦睇準網購這吸金概念，銷售已擴展至天貓商城，勢必成為增長亮點。管理層亦預期，內地業務收入貢獻，將由現時約三成，增至2015年時嘅五成。
豪特出名現金豐厚，手持淨現金達2億銀，相當於市值九成有多，變相將業務免費送畀你。秤身家，喺新加坡上市嘅同業OSIM，市賬率達8.29倍，豪特只得0.86倍，大幅折讓九成。雖然OSIM市值達100億銀，遠超豪特嘅2.2億銀，但估值相距如此大，實在不合理。另豪特市值細細粒，又多一個併購概念。主席兼大股東葉治成持股達65%，加上業務簡單，要賣盤甩手話都冇咁易。
睇圖表，豪特近月以圓底炒上，噚日創出年初以來新高，喺炒turnaround及聖誕銷情看俏下，呢轉可望借勢炒上0.9元，潛在升幅三成。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange