2014年世界盃決賽周嘅32隊已經全部齊晒，明年六月中開波，睇落四隊最有冠軍相，就係巴西、阿根廷、德國及西班牙，其他大都是陪跑份子，非洲尼日利亞自稱有希望爭冠軍，講吓嘅啫，應該仲未係時候，比利時、意大利呢類會在八強止步，至於香港球迷最熟悉嘅英格蘭，只要能在小組出線已經交到貨，殺入八強就係超標咯，想奪標，發夢冇咁早，英格蘭球員之中，只得一位朗尼係當打世界級球員，謝拉特34歲已力不從心，新人又未夠火候，睇嚟睇去都冇冠軍相。
西班牙在2010年奪世界盃，2012年得歐洲國家盃，鋒頭之勁，一時無兩，但佢哋嘅踢法與戰術已經露晒底，全靠巴塞式短傳滲入，對手排陣時出五個中場球員塞死沙維與恩尼斯達，打穩守突擊嘅話，西班牙好容易中招，南美兩強巴西與阿根廷攻守實力平均，中場掃蕩力強，前鋒方面，巴西有尼馬，阿根廷有美斯、阿古路，攻力比西班牙更強，至於德國，打法機動，嚴守紀律，任何球隊遇着佢，都不易取勝！
英格蘭自1966年憑主場之利贏世界盃後，至2014年足足48年，無以為繼，係甚麼原因？答案係英格蘭青年球員訓練不足、培訓落後，缺乏新星，朗尼之類，難得一見，睇英格蘭對德國一場（德國出B隊），90分鐘內零射門中目標，十分肉酸，皆因中場無腦，不知組織為何物，名宿連尼加曾經慨嘆：「英國學童踢波之時，應該禁止家長觀眾大聲嗌！」初看不明所以，睇真先至明白，家長愛護兒子，兒子踢波，父親大力捧場，看到肉緊時就大聲嗌：「交波？大腳解圍……搶前啲呀！」諸如此類，兒子在場上得球，每因此受到影響，不敢扭波或橫傳慢慢推波上前，久而久之，就練成高Q大腳嘅習慣，難以培養細膩腳下功夫，無法產生沙維、恩尼斯達、派路呢類球員。睇INYT訪問一家美國人，該家庭有幸得到巴塞睇中細仔，全家搬到巴塞隆拿讓小兒子（好似係十三歲）入巴塞青訓學院受訓，家長話，佢哋到巴塞練習場觀看，係唔准出聲嘅喎，邊個家長敢高叫兒子如何如何交波，會被趕出場㗎！