球壇中，安察洛堤算係好脾氣嘅教練，出名同球員關係好，但呢位皇家馬德里主帥話，以前教車路士嗰陣有個球員好唔尊重佢，激到肥安想殺死佢！嗰種嬲法簡直就似《賭俠2之上海灘賭聖》入面句對白咁：「殺死丁力個仆街！」雖然肥安冇開名，但喺我求大俠抽絲剝繭推測下，呢個「丁力」就係安歷卡！
好好先生都頂唔順
肥安接受《泰晤士報》訪問，講到以前教車仔嘅日子：「我同所有球員都相處得好好，除咗喺車仔嗰陣有一個！嗰位球員完全唔識尊重人，我真係想殺死佢，但咁係唔可能嘅。因為球員係球會嘅資產，唔可以我話點就點。」記者追問所指係邊個，肥安答：「佢個底都花晒，以前好多惡行㗎，但我唔可以開名。」肥安呢番說話引起球迷好大興趣，個個都競猜佢想殺死邊個。
等我求大俠分析吓，肥安喺訪問入面揀咗佢喺執教生涯嘅最佳陣容（見附表），泰利同林柏特打正選，杜奧巴、艾殊利高爾同施治做後備，故排除咗呢5位球員。肥安喺09到11年間教車仔，翻查嗰兩年嘅新聞，發現英國《太陽報》報道過車路士嘅法語幫成日搞事，破壞和諧，仲令肥安心灰意冷想離隊。
壞孩子曾鬧教練
目標人物開始浮現嘞！撇除杜奧巴，當時法語幫有安歷卡、沙洛文卡勞同馬隆達等人，其中安歷卡可以話係法語幫幫主。再睇番肥安嘅貼士，佢話呢位球員係向來都麻煩多多，咁仲唔係講緊「壞孩子」安歷卡！安歷卡啲衰嘢真係一匹布咁長，最經典莫過於佢同法國國家隊嘅關係，喺02年有次法國想補選佢入隊，但佢唔鍾意執二攤，所以拒絕！喺10年，佢仲試過辱罵國家隊教練杜明尼治。
另外，肥安提到有次杜奧巴比賽前遲到30分鐘，所以罰佢冇得出；不過肥安話佢兩個有商有量，杜奧巴都接受懲罰，所以嫌疑唔大。
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24