一向鍾意高大靚仔，所以「矮仔陣」嘅西班牙並唔係我杯茶，但有一位球員例外，佢就係前鋒費蘭度托利斯（費托）。由佢金髮美少年嘅「西班牙金童」年代起，到依家略為滄桑look，都好鬼正；而且佢越睇越有味，仲越嚟越似做《蝙蝠俠》嘅基斯頓比爾（Christian Bale）㖭！
雖然費托近年俾人話無復當年勇，又話佢係領隊殺手，邊個領隊教過佢，最後都慘食無情雞。不過，我始終認為費托有嘅係質素，今屆車仔有摩佬回朝，摩佬一定有辦法令佢東山再起。反正蝙蝠俠喺《夜神起義》都潛伏咗8年，先至戰勝心魔，重新上路啦！而從費托日前upload一輯自己喺健身室嘅狂操相（圖），就知佢幾有再戰江湖嘅決心。
不過，我最想費托喺球場上可以好似基斯頓比爾咁多元化，既可以做正義嘅蝙蝠俠，但做邪到震嘅《美色殺人狂》亦一樣入型入格。因為獨沽一味做正直前鋒，盞俾啲兇狠後衞踢死，未必有運行；有時點都要出啲蠱惑，喺球證面前扮吓嘢，咁先易入波呀！
文：吾中
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24