南華、傑志「升呢」打亞冠！上屆港甲冠軍南華同亞協盃附加賽盟主傑志，噚日齊齊收到喜訊，正式成為亞洲足協（AFC）嘅發牌球會，有資格參加未來嘅亞冠賽事，至於香港足總獲得幾多個參加出年亞冠盃附加賽嘅名額，今日就有定案。
亞冠盃係亞洲區球會級最高Level嘅賽事，媲美歐洲區嘅歐聯，而兩支來屆亞協盃參賽隊伍南華同傑志，早就喺今年8月向亞洲足協入紙申請「考牌」；據南華足主羅傑承太太梁芷珊透露，AFC主要考核球隊嘅青訓、設施同財務等5大準則，經過幾個月嘅審核，兩隊噚日終於收到AFC通知，正式成為AFC嘅發牌球會。試諗吓南、傑可以挑戰亞洲區「大佬」廣州恒大（右圖），真係諗起都興奮。
有望爭踢附加賽
不過，有牌唔代表有得踢出年嘅亞冠盃附加賽，事關AFC將亞冠參賽國家，由過往10個增至18個國家及地區，今次除咗香港成功考牌外，印度、新加坡同越南嘅球隊都符合資格參賽，所以香港最終有幾多名額出戰附加賽，仲要等AFC開完會，今日先有答案。傑志總領隊伍健噚日透露︰「假設香港只有一個名額，就會由上季聯賽冠軍（即南華）代表出戰。忙碌咗幾個月，終於收到呢個好消息，但我哋仍會保持平常心，做好備戰嘅工作，再等待最後結果。」
南華增兵勢在必行
至於羅生就話，無論球隊有冇得踢亞冠，增加班費擴軍都係事在必行︰「其實早喺球隊申請（考牌）嗰陣，已經覺得除門將外，每個位置都有需要增兵，而部份人選，我哋已經傾到有啲眉目，希望下個月中至下旬可以向外公佈。」被問到會唔會有畢特同基士文「同呢」嘅球員加盟，羅生笑笑口回應︰「我哋都有搵過，但唔係傾唔啱，就係年紀太大。我哋今次唔係要宣傳，所以主要想搵番啲歐洲當打嘅球員，而亞援都有搵緊。」事實上，少林寺噚日已經有個荷蘭籍嘅前利物浦預備組中場韋治（Vincent Lucas Weijl）跟操，表現都唔錯；可惜噚日隨軍友賽公民，一度同對手嘅中村祐人發生衝突，最後南華仲輸埋0:2㖭。
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24