【本報訊】南丫海難發生一年後海事處未有人受罰，政府卻申請每年增撥千萬元新設首長級職位，工黨張超雄炮轟未罰先獎做法極荒謬，「你出咗咁大件事又未有人負責，你首先要獎勵番海事處？你話要推行改革要開新首長級職位，你𠵱家啲首長級去晒邊？係咪炒咗海事處處長先？」運輸及房屋局局長張炳良昨補充，海難內部調查報告在明年首季完成。
張超雄：要改革先問責
政府申請每年撥4,000萬元增設職位改革海事處，包括海事處每年1,000萬元增設四個首長級職位，餘下職位涵蓋運房局及律政司。張超雄批評要改革先問責，應優先增撥資源予前線人員，「點解改革要搵一隊人幫手，你原本嗰隊做緊咩？你咁多年疏於職守，係你上級做得唔好以至下面疏懶，咁你𠵱家改革搵新一隊隊伍落嚟，唔好講笑啦大佬，係咪咁離譜做錯嘢有獎勵，有冇咁荒謬嘅事？」惟議案在建制派支持下獲通過。
張炳良指海難的內部調查報告明年首季出爐，但報告會影響未來公務員紀律程序，故只會適當公開調查結果；他亦拒絕交代目前調查是否已發現有人涉及刑事責任。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange