李飛說，政改諮詢不會是鳥籠諮詢，但落場踢波都要有界線，超越球場就不是波。
其實睇吓你打咩波啦，如果打排球，個波出咗界只要未落地，都仲可以救番，可以繼續比賽；如果打棒球，個波打到離開球場範圍，直情就係Home Run全壘打，照樣計分。所以並唔係話，個波出咗界就唔係波㗎，有啲運動，就係鼓勵你打出界。
我唔知道香港嘅政改係邊種運動，如果我哋係打高爾夫球，咁就算打出界都無所謂，個波落咗沙池都可以救得番，繼續打。我哋最擔心就係，明明係打緊Tennis，個球場本來大得很，但阿爺突然將佢變咗做Table tennis，乒乓球，真係大力少少都出界啦。
最慘係，香港人由頭到尾都唔知香港政改係邊種球類運動，亦唔知究竟我哋有幾大條邊界。𠵱家似乎係，每幾年就會有個阿叔走落嚟話，不如今年條界劃大啲；過幾年又有另一個阿叔話，都係唔好，條界收番窄少少好。
就算都係踢足球，個個球場大細又有唔同，阿仙奴以前個高貝利球場細到無倫，方便佢哋玩短傳滲透搓波；奧脫福個球場大就大，但邊界有條暗斜，唔熟路個啲跣鑊甘。一個唔覺意去咗波利維亞個高原球場，空氣稀薄，隨時缺氧。
所以話，唔係你決定球場邊界幾大就叫功德圓滿，你設計球場嘅時候，唔通唔駛問吓球員嘅意見？無理由係你一個人話晒事？最緊要你又唔係落場踢嗰個，手指指拍拍屁股就走咗，留番球員吃苦頭。
譬如卡塔爾搞世界盃，撐佢嗰啲足協高官坐冷氣房，梗係唔覺有問題，落場踢嘅球員要喺40幾度高溫作賽，人人嗌救命，梗投訴你挑選球場有問題啦。
最緊要，李Sir，踢波大忌，搬龍門，得閒提提一男子，唔該。