香港政改同佔中鬧得熱烘烘之際，由習近平主導嘅中共三中全會提出成立國家安全委員會，令人擔心中共會打壓香港民主自由。喺呢個敏感時刻，有市民報料話，早排喺銅鑼灣堅拿道行車天橋見到一架掛上解放軍駐港部隊車牌嘅四驅車，車頂有一個巨大呈圓拱形嘅天線，喺鬧市好招搖，令人懷疑係監聽器。
八方向城大電子工程系副教授鄭利明請教，鄭教授話呢個係接收低頻率嘅天線，例如接收收音機普通頻道嘅電波，好處係穿透力強，接收範圍廣闊，但唔會干擾手機，因手機屬高頻率電波，佢估計駐港部隊用呢個裝置主要係測試器材。
不過，軍事評論員黃東就有唔同睇法，佢舊年喺立法會選舉期間，已經喺灣仔同銅鑼灣見過呢架車最少兩次，仲跟蹤過呢架車一段時間，發現佢不斷喺鬧市兜圈，懷疑係偵測間諜或收集情報。
佢話，雖然呢個並非主要軍用設施，但喺二次大戰前後，國共就係用呢類儀器偵測敵方地下電台，所以佢唔排除駐港部隊亦用呢個儀器偵測外國間諜情報，可能外國間諜用低頻率聯絡，咁解放軍用呢個儀器去偵測，佢更加唔排除同對付佔中有關，皆因佢喺內地同澳門都未見過呢部車出現。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange