噚日係一年一度嘅粵劇日，今年主題係「飛躍新人類」，多個粵劇團體派出大批青少年同兒童生力軍粉墨登場，仲請咗八和會館主席汪明荃做嘉賓。
話說大會叫晒一眾嘉賓同班小演員上台大合照，原本企定定嘅汪阿姐，突然走埋去前排側邊嘅武生打扮小演員度，落手落腳教佢紮馬功架係點擺，係人都知汪阿姐一向要求嚴謹，見到小演員功夫未到家自然出手糾正，但呢位小演員唔知係咪緊張過度，無論阿姐點教佢都做唔到，最後阿姐索性叫佢以跪嘅姿態代替紮馬，引來全場笑聲。
另外民政事務局副局長許曉暉亦有到場，八方諗住叫佢就九龍城女嬰被拐案作出呼籲，但許副局並冇回應兼滾水淥腳離開，其後佢透過WhatsApp講唔好意思，話要趕下場，又希望女嬰可以早啲返屋企。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange