信置（083）主席黃志祥出晒名經常一支公搭港鐵（066）四圍去，華華上周五晚就見到黃志祥喺灣仔港鐵站口附近出見，即刻跟住佢，睇吓佢去邊度威，原來黃老闆走去實地巡視信置有份參建嘅灣仔新盤囍匯。
一手樓市爆小陽春，各大發展商爭崩頭狂谷新盤，務求趕搭尾班車，搵得幾多得幾多，信置、合和（054）聯同市建局合作發展嘅囍匯亦都就快開售。
上周五晚七點左右，西裝骨骨嘅黃志祥突然現身灣仔街頭，幾個箭步就行到去囍匯嘅地盤，其間仲要唔依交通規則過馬路，睇見都牙煙。
去到地盤附近，佢每行幾步就抬高頭向上望，雖然已經天黑，但佢依然睇得好入神。睇咗兩三分鐘後，唔知係咪發現有問題，佢心急到索性企喺馬路打電話反映，一路講一路指手劃腳，似乎有好多意見，動作大到驚動咗唔少sell緊盤嘅經紀，有啲仲忍唔住同個客講︰「呢個就係黃老闆喇。」
講咗幾分鐘電話後，佢就急步上咗去喺囍匯後面嘅合和中心，話唔定有嘢要親自同合和主席胡應湘講喎。
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24