現年44歲嘅李蕙敏（Amanda）上個月喺倫敦出嫁，前日佢喺九龍塘My Garden補搞結婚派對，請咗二百位賓客，黃偉文（Wyman）、張達明、吳國敬、寇鴻萍同囡囡唐貝詩等到賀。Amanda同老公晚上七點幾喺門外接受訪問，着住條閃藍色tube dress嘅Amanda同英籍老公Serge Micallef鼻頭擦鼻頭兼錫錫，sweet到爆！
「想生一仔一女」
派對冇任何主題，Amanda話好似秘密花園咁，希望朋友輕輕鬆鬆玩番晚：「裏面有桌球、飛鏢同魔術表演，仲會播放倫敦舉行婚禮嘅片段，老公睇到喊，我就唔係咁易表露。」佢話好習慣做人妻，問生B大計？佢話：「順其自然，老公想生一仔一女，要落啲工夫調理身體先。」部份朋友如蘇永康要參加鄭希怡嘅婚禮而缺席，但Wyman就畀足面，參加完倫敦婚禮，前晚又着住件晨褸襯煲呔look登場。佢透露Amanda自細缺乏父母緣，嫁到好老公都戥對方高興，佢話：「佢老爺奶奶未見過Amanda啲朋友，但竟然識得我，好明顯做咗好工夫。」Wyman又讚Amanda老公好鬼馬，揭新娘頭紗一刻，竟扮鬼臉，𠱁到大家好開心。佢哋兩公婆好有心思，安排咗一套兩罐嘅茶葉禮盒作回禮，上面有一條印有佢哋個名同Two become One嘅銀色絲帶， 寓意中西融合。
撰文：馮仁昭
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24