九龍城民生書院幼稚園舉辦十天美國洛杉磯遊學團，用以幫助幼童認識美國文化、提升語言與社交技巧！又會參觀動植物公園、博物館、迪士尼樂園、樂高主題樂園等，學生家長大小同價，每人盛惠兩萬幾、三萬元。校方承諾若學生回港後參與校內分享活動及撰寫報告，可獲校董會資助一萬元。校長解釋過去兩年的台灣和新加坡遊學團家長反應十分踴躍，要抽籤決定，遂決定衝出亞洲云云。
有家長質疑小朋友也要收三萬元團費是否公道，並關注幼童是否捱得住長途機；但亦有家長認為團費不貴，更撐校方提供選擇，使家長與學生歡度假期。這班寶貝金叵羅個個自出娘胎就坐慣長途機，去歐洲滑雪、去非洲看大遷徙，出言如此小家者肯定未見過大場面，可以不理。
讀幼稚園識寫字經已不得了，原來還識寫報告，大學生都要自愧不如，確實大開眼界！幼稚園撈過界做埋旅行社，真正有錢大晒畀機會各位大出風頭，賓至如歸，做得好！
至於有人揶揄連幼稚園也到美國遊學，那麼小學生和中學生可能要去南極甚至月球。香港人真係唔掂，強國真不愧是強國，地強人更強，人家中小學生的遊學團，不叫遊學叫考察，南極有企鵝，北極當然有北極熊，全部實地考察包埋生態環境，每人費用廿萬人仔還不到，氣定神閒。香港人小小區區三兩萬，上埋報紙仲要呱呱嘈？失禮又羞家！
我份人最會從善如流見錢開眼，雖然我家2T用不着，都望造福怪獸社羣，一於籌辦幼稚園留學，提供一條龍服務，全程包用港媽指定尿片、奶粉、沖涼液，保證不會水土不服，食水都由香港運過去。這盤生意，肯定長做長有。公開集資，誰有興趣？
張慧敏
http://www.facebook.com/HKcareerdoctor
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24