港大幾年前為咗籌款興建新校舍百周年校園，曾經向校友埋手搞咗個「一人一磚」計劃，將幾幅放喺百周年校園公園牆上嘅磚，畀捐款資助母校嘅校友喺上面刻名，甚至刻上自己嘅古仔都得。塊磚牆噚日終於揭幕面世，原來已有1,700名校友同各界人士支持，當中唔少都係城中富豪、名人同政界人物。
就好似退隱多年、人稱大Sir嘅政壇元老鍾士元，都有用個人名義捐錢贊助母校，佢喺塊磚上用英文寫咗自己個名同畢業年份，原來大Sir係1941年港大畢業，仲要係一級榮譽生。其他大家熟識嘅政界中人仲有葉劉淑儀，佢塊磚只係寫咗自己個名；而當年喺釣魚台捐軀嘅陳毓祥都冇俾人遺忘，師弟妹捐錢刻字紀念佢事迹；而程翔就同太太一齊刻字貢獻母校，寫上「感恩 惜福 隨緣 知足」。
除政界校友外，醫學院唔少猛人校友都認捐，好似中大校長沈祖堯伉儷，換肝之父范上達一家人，仲有金刀梁之稱嘅梁智鴻都有份刻名。而天文台前台長林超英就三兄妹一齊捐錢刻字，仲用「天．地．人」形容三兄妹成就，就比較有心思。當然籌款唔少得向一班城中富豪「揼心口」，當中李嘉誠嘅舅仔莊學山就同家人一齊捐；賭王何鴻燊就刻咗自己英文名；就連大劉嘅專用飯堂福臨門都有捐錢，認真唔話得。
mailto:[email protected]
■多年前喺釣魚台捐軀嘅陳毓祥，師弟妹都有出錢喺磚上刻字紀念佢。
■程翔同太太都有喺磚牆上留名。
■林超英三兄妹以「天地人」形容各人發展，都幾特別。
■沈祖堯同太座都有捐錢，大讚醫學院「百年基業．春風化雨」。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange