曼聯老將傑斯喺星期五（11月29日）就迎接40歲，日前主帥莫耶斯大讚威爾斯球星踢得唔似40歲，睇落亦唔似40歲，無論體能抑或外形都同不少年輕球星有得「揮」。
傑斯長青嘅秘密，原來係練芭蕾舞同玩女士最愛嘅瑜伽！皆因兩者都可以幫助球星伸展同強化肌肉，傑斯更係紅魔內第一位將瑜伽加入操練內容嘅始祖！不過前曼聯青訓教練哈利臣（Eric Harrison）認為，芭蕾舞至係真正幫助傑斯延長職業生涯嘅「功臣」，尤其係傑斯大腿受傷之後，練芭蕾成為威爾斯人嘅轉捩點，仲好似不知不覺地練成金剛不壞之身，極少傷痛兼弗到漏油。不過傑斯並非被迫加操，本人自言非常享受每日做運動；近朱者赤，實在奇怪朗尼竟然冇被傑斯感染，多加操練。
傑斯人生贏家
90年加入曼聯一隊至今，老臣子傑斯已為紅魔贏得13個英超冠軍、4個英足盃、2個歐聯錦標，且射入過168球，40歲前早已名利雙收，絕對稱得上係人生嘅贏家。
林肯講過，一個人40歲之前嘅樣貌係由父母決定，40歲之後卻由自己決定，所以要為自己40歲以後嘅長相負責。意即，你40歲之前可以話係原材料問題，輸在起跑線上冇辦法；但40歲後你樣衰係自己一手造成。當你手執漢堡時，想像一下傑斯都日日運動。宅男宅女們，動起來吧！（溫馨小提示：女士25歲新陳代謝已經走下坡！）
文：呂晨
以女性角度看球星新聞，唔用眉筆用原子筆寫低球壇百態！
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24