性格真係決定命運。梁振英鍾意落區接受群眾歡呼，一如明星喜歡歌迷掌聲，政客也享受群眾讚美及掌聲，此乃人之常情。但為咗一位政客嘅喜好，勞師動眾，公公婆婆晨早十幾個鐘前被動員去攞籌，場外警察高度戒備，示威區重重鐵馬。但所謂地區諮詢會內，被動員去嘅居民，將預早安排好嘅問題提出，得一男子可以一展所長。如此政客show，問與答均按劇本進行，由頭到尾都係成全一男子個人喜好。
同情地理解，一男子又真係幾痛苦，除咗競選期幾個月，無知市民俾梁粉報愚弄，對佢有好感，但蜜月期在佢上任前已經告終，未上任爆出僭建醜聞，跟手改組失敗，然後反國教打到灰頭土面，親密戰友一個一個爆醜聞，未到一年民望已不斷尋底。一心以改革者形象上位，變成一個毫不受尊重嘅政客，你話內心會幾痛苦。
要平衡內心怨憤，自然需要找回選舉時，那種群眾擁護的感覺，但今時今日，要有真心膠擁護梁特首，談何容易，於是一場又一場由地方勢力導演的地區親民show便不斷上演，越演民望就越低，冇乜人認真看待，而梁振英但求自我感覺良好。
對於一個民望屢創新低，仍大言不慚，表示不會自滿嘅政客，我哋仲有乜嘢說話可講。以前好多人批評佢狼、兇狠，但十多個月表現，越來越似一嚿「真心膠」。
政治判斷頻頻失誤、與建制派關係疏離、傳媒關係更差、同中央官員也唔見得好，可以話比上兩任更差，至於政務官系統，更加唔使多講。如果係一個深謀遠慮，有謀略、有人脈嘅大奸角，點會搞到咁，真係錯得都可以錯，係人都得罪晒，仲唔係真心膠？
無風可起浪
一個空有野心嘅膠人好大鑊，正因為唔知自己有幾膠，所以乜都搞搞，佢師父董建華已經係極品，𠵱家又再來一件，香港人真係命苦。電視發牌搞出大頭佛，而政改諮詢還未開波，幸好北京有先見之名，將工作交予能吏林鄭月娥。問題係今日政府已到咗無風起浪地步，隨時施政報告、預算案一兩單小事，陳茂波一兩句低B言論，也會引起政治衝擊。香港人感覺上梁振英好似做咗幾年特首，接近任期完，但實際上佢只不過發表咗一份施政報告，成立咗好多個委員會，冇乜實際嘢做過。
公眾對施政報告諮詢冇興趣，大家淨係想知一年前成立眾多委員會，一年後有何成績可向公眾交代。
添馬男
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24