兩星期前在馬場碰到基金界資深人物T先生，問佢坐在那一個廂房，點知佢竟然話：「我一個人入嚟，喜歡企喺沙圈附近睇馬。」吓？基金T假假地係行尊級又係馬主，企在欄邊會唔會自貶身份呀？基金T話：「我又唔係電視電台出鏡人物，馬迷唔會認得我嘅，我好鍾意沙田馬場啲現場氣氛，係沙田常客，跑馬地賽馬就好少去，企喺呢度，算係深入群眾，聽吓馬迷吵媽拆蟹咁鬧騎師、賽事董事，出一口烏氣，乜壓力都冇晒。起碼梁振英會覺得高興，多啲馬迷就少啲人上街吖嘛！」
之後相約在中環吃午飯，前日相會於蘭桂坊，一個中午套餐（set lunch）只係百零蚊，基金T話好抵食，梗係啦，相對於佢管理嘅基金及日常買賣股票銀碼，百零蚊都唔夠零點一個仙。在中環梗係講股票唔講馬，佢話目前港股受中資股左右，中資股又受北京消息左右，佢懷疑有大量知情人士係春江鴨，知道三中全會改革方案，一早買定先，呢役炒三中全會概念賺到盤滿缽滿，香港投資者唔夠玩嘅，故此佢代客（本地世家客為主）管錢，小心為上，近年逐漸將投資重心移往美國股，理由有三：（一）美國大把真實非空殼公司，有真實業績支持，（二）美國也有內幕交易，但逃避證監會困難好多，股市較為乾淨，（三）美國始終掌握最後銀紙印刷權，印幾多話俾你聽，容易估計，不似得中國暗中量寬，高幹及有關人士係先知，港人後知後覺。
佢轉移投資重點又係啱時候啫，過往五年美國股市跑贏全世界，勝過買中國A股指數十年不變。
基金T搵錢不成問題，反而關心政治，因為梁振英上台後，佢開始感覺到有啲窒息感，覺得有人太強橫，膽敢指鹿為馬，用歪理侮辱佢嘅智慧喎。基金T話：「我諗香港人唔會抗拒北京係阿爺，有權話事，但會好抗拒本港所謂領袖，為了擦北京鞋而做到過晒火，當香港人係細路，乜都亂嚟。如果阿唐做咗特首，佢只會面對政改一項難題。依家CY做咗特首就製造出全方位經濟社會政治難題，連我呢個股市達人都有衝動參加佔中！」梁特首係有本事嘅，識得如何刺激平時政治冷感嘅人上街吖嘛！