凌晨5點，鬧鐘響之前彈起床。之前試過幾次想早起身睇波，都過唔到張床嘅誘惑，但今次冇問題，因為要起身學做人，係跟伊巴謙莫域學做人。
其實只係盡人事睇下半場，全場睇晒嘅話真係會打亂晒生理時鐘，睇半場亦即是NBA睇第四節一樣，係唔夠原汁原味，但起碼都睇到大結局吖！何況呢次係睇呢位自稱「上帝」嘅人物，估唔到仆到出廳，開電視真係見到佢施行神蹟，入完一球又一球，幫瑞典射成2:1，入多一球嘅話，C朗嘅葡萄牙就要讓位，伊巴就可以做上帝。
喺咁震撼嘅場面之下，伊巴入完波都只係輕輕揮一揮拳頭，各位巴打要學第一招：就係有得威嘅時候唔好咁浮誇，反而冷冷漠漠咁「戚一戚」嘴角，先似見開大場面。
點不知，睇下半場就好似睇精華咁，伊巴嗰頭入完兩球，C朗竟然即刻一個突擊完又一個突擊，來個連中三元，徹底結束咗瑞典嘅一絲希望。好一個伊巴，眼望住C朗入波，竟然可以一啲表情都冇，彷彿世事都俾佢睇透咗。C朗入第三球時佢仲拍手掌㖭，唔係咁有風度吓話！不過佢賽後已經兜番，話拍手掌係鼓勵吓啲隊友精神啲啫，唔係長他人志氣，只要你有得興奮嘅時候唔好太忘形，到你跌落谷底時亦唔會太傷心，睇伊巴就一清二楚。
輸咗，但可以keep住型，其實喺運動場上好難，但係伊巴又得㗎喎！「冇得踢世界盃可唔可惜呢？」記者潤吓佢，俾佢潤番轉頭，「冇我嘅世界盃，都唔好睇嘅！」玩死。若果唔係伊巴而係一般普通人如你同我咁講嘅話，叫做乞人憎，但係佢講呢我就叫有信心。「咁呀C朗兩回合表現咁神勇，你覺得佢係咪應該攞金球獎呢？」記者又撩事鬥非。「我唔知喎，我淨係知佢入多我一球啫！」咁易俾你挑撥到，就唔係上帝啦。伊巴呢一招，就係做唔到第一，都要做最獨特。
睇C朗踢波，似睇賽車，快到似飛嘅佢充滿官能刺激；但睇伊巴踢波就好似睇魔術，每一次出場嘅表演都同上一次唔一樣！你上網睇吓佢多年來入波嘅精華就一清二楚，當佢用後踭窩利將個波放入網嘅時候，真係有啲似係第二個星球嘅人。
KEYMAN
now TV主持
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24