一踏入11月，阿John蔡約翰攻勢凌厲，連贏六日進帳14W，數字上仲多過個別倉口成季總和，神仙即係神仙，最得人驚係暫時所贏嗰21場，由莫雷拉、杜利萊、韋達、楊明綸、安國倫同田泰安包辦，擺出盡收天下兵器強姿態，之但係馬迷就冇路可捉！
今日神仙出五隻，難題1：能否連贏七日？難題2：五隻馬用五個不同騎師，邊個至係出擊重心？成功率最高嘅安國倫呢期冇分，跟住嘅杜利萊就有隻「名列前茅」，但跑咗17場都仲未贏過，話你知Sure Win都要諗諗！昔日嘅孖公仔韋達，就只得贏開嘅「戰利品」，然後「劍飛聲」Matthew蔡明紹、「紅駿」巫斯義、「歡樂時光」柏寶，佢哋季內只有Matthew同阿John交收過一次，唔通神仙用博你唔信呢招？
唔理其他純以馬論馬，尾場隻「歡樂時光」上季由柏寶贏過；「紅駿」雖初配巫斯義，之但係同主「君河」上季一交畀佢即爆15倍，而夏佳理隻「紅色禮物」，月初跑墨爾本盃僅敗，下個月衞冕香港瓶，各有各淵源。至於「劍飛聲」嘅Matthew，出道咁多年從未贏過神仙嘅馬，之不過前季Matthew幫同主隻「華劍寶」兩捷，「劍飛聲」升班負輕磅贏馬嘅安國倫造唔到磅，阿John原本一早卜定楊明綸騎，點知同綸仔關係友好嘅「波幅」系傅果權名下「波幅再現」咁啱又跑同一場，分身乏術，後來阿John搵到Matthew幫手先肯放人。所以今次「劍飛聲」用佢係有段咁嘅古，之但係當大家覺得唔似冇數據支持嗰時，往往係出擊時！文：高明
Email:mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange