陳木勝有火。
「火爆導演」的稱號並非浪得虛名，飛車、爆破、冧樓、冧橋都視作等閒，作品已跟動作畫上等號。盛名是一種束縛，招牌菜容易變成負累。陳木勝自言想過拍文戲，奈何付鈔投資的老闆不想跟銀紙鬥氣，賣埠票房高於一切，因此被迫「打下去」，情況多少像新作《掃毒》中三位男主角一樣，帶點無奈，又有點身不由己。難得情況有變，借用致敬英雄片，套用《一代宗師》金句，武戲可以文唱，爆火之間隱含兄弟情，子彈成功收買眼淚，難怪連老闆林小明近日都經常問人「有冇帶紙巾入場」。
撰文：文國駿
題外話，據知《掃毒》老闆之一的林小明，近日開口埋口見人，第一句不是問人「食飯未」，而是「帶咗紙巾入場未」。
《掃》片的導演陳木勝一向火爆，指的是他的戲種，跟脾氣無關，導演本人溫文爾雅跟「火」完全拉不上關係。早前陳木勝接受本報專訪，談吐間貫徹不慍不火，跟作品大相逕庭，事實上他無時無刻都想拍一套全文戲，但被市場所限，市場代表老闆，陳木勝說：「全文戲遲早都要拍，今次喺《掃毒》都試圖拍好多文戲。市場唔容許拍太多文戲，之前有一套電影，好多賣埠嘅反應係『成龍竟然冇打戲？』咁老細梗係話個埠緊要，要剪番啲打戲入去，平衡點好難拎，因為作為導演始終想講故事嘛，動作好難講故事。我就有啲似《掃毒》嗰三個主角咁身不由己，但總有一次希望可以自主一下，不過我年年都咁諗，年年老細都叫我唔好諗咁多，整多嘢（動作片）先，哈哈！」
喪煲《英雄本色》
陳木勝解釋拍《掃》片的概念由來：「我嗰陣睇套紀錄片係美國掃毒組去追一個哥倫比亞毒王，個毒王自己有個島，你諗吓幾勁，成件事追咗兩年幾，毒王最後忍唔住問掃毒阿頭點解要追住佢唔放，阿頭話冇辦法因為佢係警察。我覺得能夠有人咁一條心去滅罪掃毒，死心塌地做好一份工嘅人𠵱家好少，我好感動，所以有呢個念頭。」《掃》片主要講述三位好友的兄弟情，動作反而成為配襯，陳木勝笑言劉青雲、張家輝及古天樂亦是他的真兄弟：「我一有念頭就同一時間搵佢哋三個，嗰陣乜嘢劇本都冇，但真係好開心呢三個人都拍晒心口話冇問題，劇本可以慢慢傾。」
電影中有不少場口可看到陳木勝向《英雄本色》致敬，他亦不諱言是實情：「好老實講，我拍緊時都有狂睇《英雄本色》，想從中搵到佢個情懷，導演最感動人係表達到情懷又講到故事，致敬之餘我都想試吓唔扭橋而行真實感情。」會否因《英》片而給《掃》片無形框架？他表示：「唔會，因為我未拍過嘛，人哋拍過係人哋嘅事，我如果試過就大件事喇。」
三主角大執位
劇本不是問題，反而三位男主角戲份如何平衡分配更傷腦筋，陳木勝坦言：「我試過撈亂晒佢哋三個角色，又試過還原番。不過佢哋三個將角色生命化咗，比我投入感更強，好似賽馬咁佢哋勒唔住，唔使開鞭就自動波跑，我只負責平衡。」張家輝及劉青雲兩位影帝有好演出是意料中事，難得的是古天樂在片中的情感亦拿揑得準，問到陳木勝如何引導他？他給古仔平反說：「唔應該咁區分，我可以好肯定咁講古仔都係影帝級，佢好演技，都入圍過，不過好演員未必個個都做影帝。」他指古仔於拍攝期間跟他的爭拗最大，而自己亦被他說服：「我起初想佢個角色出錯後轉變為內斂，罪惡感重，佢就話角色其實會更邪惡，因為自己催眠自己冇做過壞事，佢畀我好好嘅神來之筆，反而係佢畀我建議。」
電影於香港、澳門及泰國三地拍攝，更在泰國拍攝大場口的爆破戲，陳木勝表示：「其實喺泰國拍攝好大自由度，有軍方支持，唯一難處估唔到竟然係車，佢哋嘅車貴香港三倍，所以個預算大咗三倍，惟有節衣縮食。」
場地提供：The Metroplex
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24