尼馬喺巴西深入民心，影響力真係勁到你估唔到，連毒販都要搵佢做生招牌。早幾日巴西警方檢獲一批可卡因，發現上面都黐住張尼馬貼紙；唔通呢位巴西新球王有份販毒？當然唔係啦，其實因為喺當地毒品市場，黐住尼馬貼紙嘅就代表高質素！
可卡因貼上尼馬貼紙
上星期四，巴西警方拉咗個27歲毒販，喺佢度搜獲大量毒品，包括31包可卡因同埋一啲大麻；最奇怪嘅係，嗰31包可卡因上面都黐住尼馬嘅貼紙。警方都覺得奇怪，查問之下，原來尼馬貼紙係個標記，代表住呢包可卡因同尼馬一樣咁高質素，係高純度嘅靚貨，好似陳永仁喺《無間道》試貨，試完大讚AA+咁；總之只要認住尼馬個樣，就必屬佳品啦！
我求大俠唔係叫大家吸毒，但透過呢件事，可以見到尼馬喺巴西嘅形象係幾咁入屋；同埋喺普遍巴西人心目中，尼馬就係正嘢嘅代名詞。
美斯自信1月強勢復出
21歲嘅尼馬今年極速上位，幫巴西捧走洲際國家盃，佢對日本入嗰球遠射仲入圍埋今年度嘅普斯卡斯獎。尼馬射門、盤扭、傳送同速度都非常勁，今夏仲以5,700萬歐元（約6億港元）高價由山度士轉投巴塞隆拿。佢適應得好快，已經喺西甲取得入球；嚟緊美斯受傷，相信尼馬將會擔大旗。而喺下年世盃，佢亦都會係巴西嘅主力，力求幫「森巴兵團」喺自己國土上封王。
另外，美斯近日接受訪問，講到自己嘅傷勢：「受傷令人難過，不得不要缺陣一段日子，但我冇驚過，冇擔心過，因為一定會好番，我會喺出年1月復出。我會先返去阿根廷養傷，之後會盡全力恢復，希望可以返番去巔峯嘅水平。」問到世盃嘅爭標形勢，美斯就好謙，話佢哋同西班牙、德國、巴西都係有力嘅競爭者。記者亦有問美斯同基斯坦奴朗拿度嘅關係，佢嘅答案亦睇得出兩個人冇咩交情：「我哋從來都冇交換過波衫，佢亦都冇主動問過我要。」
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24