雷霆周四主場硬撼快艇，又有球迷喺半場玩射波遊戲入波得到兩萬美元（約16萬港元）獎金！好事成雙，主隊憑前鋒杜蘭特貢獻28分、8次助攻，以105:91大炒客隊，奪得04/05年球季由西雅圖搬到奧克拉荷馬城之後，第一次季初主場5連勝。
呢位叫Brad Brucker嘅33歲高中老師，周四喺半場休息嘅半場射波遊戲入面，助跑幾步後雙手一推，個波撞中籃板入咗，奪得兩萬美元獎金，成為今年雷霆第5位贏到呢個遊戲嘅球迷，離場嘅時候仲得到杜蘭特經理人Jay-Z同佢歌手老婆Beyonce祝賀！
粉絲半場入波例贏
雷霆連續兩場有球迷半場入波，而今年已經有5位球迷得到兩萬美元獎金，即係已經送咗10萬美元出去；不過球會發言人馬漢尼就話，贊助單位MidFirst銀行會繼續「科」水：「贊助單位認為呢個活動對球迷同社區有好好嘅推廣作用，佢哋唔會考慮減低獎金。」繼續玩呢個遊戲對於球迷嚟講梗係好，而且對球隊都係好事，因為今年雷霆每逢有球迷半場入波，都可以順利贏出比賽（見附表），咁好意頭梗係要繼續搞落去啦。
杜蘭特全場最高分
至於比賽，主隊多得杜蘭特攻入全場最高28分，同球隊手風唔錯，由頭帶到尾，快艇就算有比歷克格芬有27分進賬，同基斯保羅以13場「雙雙」，刷新聯盟10分及10助攻以上紀錄都冇用，點追都追唔到，最後只可以14分之差輸波。賽後杜蘭特講番球迷半場入波一事，就講笑咁話：「如果球迷不停咁半場入波嘅話，球會真係破產都唔得掂。不過，喺場邊見到佢哋入波，真係好過癮。」
雷霆未來4場波都喺主場比賽，到時將會繼續有球迷挑戰呢個半場射波遊戲。雷霆周日將會對𠵱家喺西岸包尾嘅爵士，以現時呢個氣勢，雷霆想輸都難！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange