郭富城入行30年由《九一神鵰俠侶》到《三岔口》走動作路線，至《父子》打破這個藩籬，意念昇華到文戲武唱。現年48歲的城城，場內角色由動轉靜，場外賽馬、學揸遊艇貫徹舞王愛動本色。作為圈中老手經歷演藝生涯高低，以前無的現都已經擁有，不是賣廣告，亦不算發財立品，只是越來越有要求，兩屆影帝品味隨「無求」自我提高。在新作《全民目擊》中跟內地實力派演員孫紅雷合作，他期望：「打好波都要有好對手。」
撰文：文國駿
郭富城與內地導演非行日前於灣仔一餐廳內接受記者訪問，《全民目擊》絕大部份的場景發生於法庭內，行內稱之為文場戲，正所謂講多過做，反而城城非常雀躍，原來文戲可以武唱，他說：「中國以至亞洲都好少有呢套電影咁嘅起承轉合風格，而且我會用法庭動作片嚟形容，大家針鋒相對嘅對白好精采，好似拳來腳往咁，不過全國語對白對我嚟講當然有難度，所以導演三個月前已畀晒對白我準備。」
城城不久前才於好友楊采妮首次執導的電影《聖誕玫瑰》擔任檢察官，今次於《全》片又演繹同一崗位，他坦言是個挑戰：「兩套電影都係演檢察官，不過一個香港一個內地，好彩我有唔少時間去準備同分清兩個角色，我拍完《聖誕玫瑰》一星期後就開《全民目擊》，我唔想兩個角色演得似，同時都係好好挑戰，畀人見到演技上郭富城可以一種角色兩種演繹，不過兩個角色一個係柔弱啲，一個好剛烈，好彩有呢種反差。」
減導演負擔
《全》片是非行執導的第二部作品，翻查資料，其實不難發覺城城近年常與新晉導演合作，例如楊采妮、陸劍青、梁樂民、夏永康及周顯揚等，城城坦言很想幫新導演減輕負擔：「我支持新導演，希望用自己演技去幫佢哋完成作品。大家都多啲空間發揮，有經驗嘅導演有自己要求，睇嘅角度好準，而新導演你可以畀更多嘢佢，有更闊演出方法，可能會互相輝映，各有各火花，而減輕佢哋負擔，都係專業演員責任。」
電影中最矚目的一場戲是城城與孫紅雷用言語交鋒，該幕長達八分鐘，城城笑言氣都冇得唞：「嗰場似文戲嘅武打場面，用對白、說話層次交手，對我嚟講係好挑戰同鍛煉，嗰場拍得好順利，因導演前一日整日畀我哋綵排，去消化，第二日大家都喺狀態，知走位等。其實好演員係要成全對手，若果成全唔到對手順利推進情緒會係我責任，所以我必須做到最好，冇呼吸停頓咁滯。」
撻着孫紅雷
談到與孫紅雷合作，城城大呼：「正吖！我哋惺惺相惜，有好好火花，老套啲講好球手都要有好對手打，先可畀觀眾睇戲味，今次大家互相影響，我喺戲入面每場戲都要畀佢壓力。」問到二人在片場的氣勢是否不相伯仲？城城笑言留待觀眾及導演評價，但一定會與孫紅雷再次合作，而非行亦已寫劇本中。
將邁入演藝生涯的第30個年頭，城城坦言得多於失：「呢30年過得好快，係充滿喜悅，一定得多過失，唔係要得到全世界，我相信係默默耕耘，懂得知足，有掌聲同歡呼聲已值得，失去嘅嘢都係微不足道。希望去搵另一突破點，繼續學習，想自己創作劇本同做導演，唔係要有幾叻，係去領略過程，唔同歲月有唔同吸引力，希望大家睇到不斷蛻變嘅郭富城。」
化妝：Fannie Chan
髮型：Ian Wong（ii salon）
服裝：I.T/JPG
場地：LaCucina Italiana（The East）
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24