千億新抱徐子淇同夫婿李家誠噚晚喺灣仔，主持恒基旗下新酒店Mira Moon嘅開幕禮，徐母同子淇妹妹徐子欣都有嚟撐場。子淇一身DG連身裙，手上仲騷一隻20卡巨鑽戒指行頭，原來係老公送畀佢舊年嘅生日禮物。
質問老公
講到月尾子淇31歲生日，之前有傳李家誠重手斥資一億三千幾萬送遊艇做重型生日禮物，李家誠即澄清：「係屋企人用，用嚟同仔女出海，唔係生日禮物，佢生日會有驚喜畀佢。」
子淇仲話同老公識咗十年，結婚七年，仲好搞笑咁即場𢱑老公衫問有冇七年之癢，佢之後補充：「兩夫婦互相尊重，唔會對對方冇禮貌，都會有少少拗撬，有次佢發脾氣，佢反而話由細到大父母都冇話過佢，我就話番佢應該要檢討吓。」
李家誠有份畀意見設計新酒店：「個名叫Moon，用咗嫦娥奔月個概念，所以用咗好多兔仔。」馮仁昭笑言子淇會唔會「常哦」上身，佢笑笑口話：「我畀好多空間佢。」佢哋仲話成日去試酒店，不過都係帶齊小朋友去，子淇話：「我仲有潔癖，次次都要帶兩樽滴露抹乾淨。」
撰文：馮仁昭
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24