大家唔記得TVB（511）係上市公司，管理層要向股東負責。
台慶平均收視低見29點，在現時一台獨大情況下，今次網民熄機行動十分成功。阿叻向網民挑機，成功為對家造勢，主流媒體日日跟進，提高公眾對熄機行動嘅認知程度，網民真係要衷心多謝阿叻。其實熄機事件，反映TVB、福祿壽等人，已經落後於新媒體時代，變成阻止變革保守勢力，相信今後針對TVB行動會陸續有嚟，手上持有TVB股票者要小心「政治風險」。估計TVB管理層仍未意識到已身陷危機，要重新制訂應對策略。
台慶低收視 卻死不悔改
TVB命脈係廣告商，平時俾TVB獨大廣告商肉隨砧板上，冇力發圍，今次會借熄機行動反壓TVB畀多啲折扣。無論阿叻好、李寶安好、陳國強好，都低估咗網民影響力，在政府spin下，製作喉舌《東張西望》，為梁振英宣傳，結果激起民憤，群眾由針對梁振英轉移至TVB，當中失誤，管理層難辭其咎，當初邊個接政府張單，應問責下台。為政府作宣傳，可能推唔甩，但製作出低水平「hard sell」節目，就好得人驚。
第二，邊個授權陳百祥高調向網民挑機，如果佢因自恃陳國強老友，而可自把自為，TVB管治水平，實在令人擔憂。當陳百祥不斷失控時，李寶安有必要公開與陳百祥劃清界線，宣稱佢並不代表公司立場。假如陳百祥係獲管理層授權作出反擊，管理層大有問題。作為一間上巿公司，TVB管理層應向所有股東負責，而非向陳國強一人負責。TVB點可能俾陳百祥一人騎劫？連捐錢屎橋亦由佢宣之於口，TVB事後追認，大佬，TVB幾時變咗明星足球隊。
第三，在台慶低見29點後，TVB仍擺出一副死不悔改姿態，冇反省、冇檢討，連最基本表示會聽取反對者意見，努力提升節目質素都欠缺。TVB如果趁機打出改革自強，十個王維基都唔夠打，有本事打敗TVB只有TVB自己。在方逸華主政，費道宜揸fit年代，TVB早已建立咗一個強大嘅製作及成本管理系統，只要在創意方面追上去，點有得輸。好多人誤解網民就係一小撮滋事分子，同政府一樣，唔明白網絡不過是媒體平台，而最重要係意見及立場質素，是否具代表性，真正反映求變心態，TVB管理層冇理由唔知道，2009年中期檢討公聽會，已有相當多批評劇集質素低及新聞不公正，再者，佢哋根本冇重視過民意。
2015年TVB牌照屆滿，2014年初通訊局便會開始舉行公聽會，收集民意，TVB再任由陳百祥等癲落去，到時等睇大龍鳳。
添馬男
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24