港股突破23500點阻力後，噚日終於出現一次較明顯嘅震倉，之前熱炒嘅內銀股奶粉股全線回氣，接力炒上嘅有煤炭股同航空股，板塊輪流炒局面不變，反映資金依然喺度搵獵物。
噚日大市回調，主要受兩個消息影響，一為儲局會議紀錄顯示，唔排除下個月會減少買債規模，另外就係11月匯豐中國PMI 初值回落至50.4水平。事實上，美股早前突破萬六點大關後，未能強勢再上，滬綜指亦升近下降軌阻力，兩大股市稍事回氣，港股自然要乖乖跟隨。去到呢個水位，戰友持股若仍有利潤嘅話，不妨先沽一半，始終有利潤落袋，坐貨都坐得安心啲啦，升浪亦可以食得盡啲。
早前內地終宣佈放寬一孩政策，相關概念股隨即炒上，蠟筆小新食品（1262）主打果凍、甜食及飲料產品，絕對食正國策。截至6月底止，集團半年賺1.87億人仔，按年增長16%，毛利率及EBITDA比率均錄得升幅，現價年度化市盈率約11倍，較龍頭食品股旺旺（151）及康師傅（322）平均約35倍市盈率，大幅折讓近七成。睇圖表，股價再次逼近5月高位4.68元，一旦升穿，量度升幅可見5.3元，較現價4.57元高16%，屆時市盈率都未夠13倍。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange