鍾楚紅前晚身穿紫色低V性感Elie Saab晚裝，到中環置地廣場出席亮燈活動，紅姑在台上大談聖誕慶祝活動，她說：「我好鍾意聖誕節，鍾意煮嘢食，節日我多數出門，去陽光海灘或者冰天雪地，今年冇準備外出，焗住喺屋企，會請十幾個朋友嚟屋企食聖誕大餐。」
峇里盡興
記者笑紅姑要找一個聖誕情人，她說：「聖誕就想，平時唔想，已經獨立慣。聖誕一個人好陰功，冇試過一個人過，太慘。」
紅姑透露剛從峇里度假回來：「隨時可以再去，太鍾意呢個地方，最享受假期，乜都唔使做，淨係跑步游水，今次曬到皮膚敏感，不過開心咗先。」會否在峇里穿三點式泳衣？她說：「一定係三點式，一件頭好焗，焗到出汗，幾十年嚟都係着三點式，自己都驚有狗仔隊，一見有黃皮膚就會搵嘢披住。」
此外，紅姑透露當年投資的度假屋已賣掉，問到會否再起屋，她坦言：「有諗過，想起間細啲畀自己，不過暫時未有計劃。」
採訪：林嘉慈
攝影：仇志德
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！