我求大俠成日見啲網民話，如果邊支球隊輸，佢哋就落街裸跑，或者切咗身體某個部位，但咁耐以嚟都未有人真係講過算數。法國靚女主播多莉亞（Doria Tillier）前幾日都講過類似嘅嘢，假如法國喺附加賽次回合反勝烏克蘭出線，佢就剝光豬報天氣！結果法國兩回合贏3:2晉級，多莉亞話就話守信用喺鏡頭前大解放，不過又邊有咁大隻蛤乸隨街跳，電視畫面入面嗰位全裸多莉亞細到你唔信，一心諗住睇「黃色」天氣報告嘅觀眾，似睇風景片多啲喎。
27歲嘅多莉亞做過模特兒同演員，𠵱家喺法國電視頻道Canal+做天氣報告嘅主播。上星期五，法國喺附加賽首回合作客輸咗畀烏克蘭0:2；多莉亞公開話，如果法國次回合贏得番，佢就全裸報天氣！
承諾出線全裸報天氣
可能一眾法國球星都好想睇靚女除衫，所以次回合搏到盡，最後主場大炒烏克蘭3:0，總比數3:2反敗為勝。我求大俠欣賞多莉亞，佢最後冇「借啲二」走數，周三兌現承諾喺節目中全裸出鏡。不過，佢嘅全裸方式就難免令一眾觀眾失望。
喺wide shot入面，疑似除晒衫嘅多莉亞就喺草地上跑嚟跑去；佢喺畫面入面得粒米咁大，唔好話唔知佢有冇全裸，你話入面裸跑嗰個係夏蕙姨都得啦！但從另一個角度睇，我求大俠覺得多莉亞算係有口齒同有心思，諗到個方法可以履行承諾之餘，又可以喺電視嘅尺度下出街，一班想入非非嘅朋友亦都吹佢唔脹。香港網民對呢件事有唔同意見，有啲話用顯微鏡都睇唔到；有啲就讚佢美貌與智慧並重；亦有網民開埋名，希望CCTVB主播周嘉儀可以為香港足球犧牲！
成人網站都down埋
另外，有個法國成人影片網站亦喺賽後益街坊，兌現晉級後就免費開放網站一晚嘅承諾。據網站負責人話，當一完場後，佢哋就開放個網站，點知開咗40秒，就因為太多人瀏覽而令網絡癱瘓。
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24