上季玩完馬後炮，今季就做預言家，同大家一齊睇吓嚟緊周末有咩好睇。今周傾乜：玻璃腳美斯仲有冇貨交？
2003年11月16日一場巴塞對波圖（唔好心邪，唔係馬賽對波圖）嘅友賽，美斯後備上陣，為巴塞一隊踢個人地標戰，轉眼之間，美斯已經為巴塞征戰10年有多，拎過西甲、歐聯、西盃等等等冠軍，金球獎、西甲同歐聯神射手獎亦都拎到手軟，26歲嘅美斯去到頂峯未，定係其實已經早熟早殘？
美斯因為大腿傷，預料明年先可以復出，而且開季至今入球率，均遠低於近年。其實由2004年10月開始喺一隊火速上位，美斯9年幾以嚟一直都係巴塞不可或缺嘅成員，好彩西甲已經冇英超、德甲咁體力化，後衞冇其他聯賽咁凶狠，否則美斯以前嗰種單打獨鬥個人爆破嘅球風，長期受傷嘅次數點止咁少。
可以預期美斯之後個人突破嘅次數將會漸減，正如阿根廷之前嗰位球王馬勒當拿咁，1986年世界盃未夠26歲，一人之力扭晒成隊英格蘭咁滯，最後仲幫阿根廷贏埋冠軍，但到後期已經猶如中場指揮官，主要都係交直線同遠射。
如果美斯要延長個人足球生命，踢法要更加聰明，呢幾年喜見佢嘅罰球水準提高，禁區頂遠射都有一手，以佢嘅足球智慧，墮後踢進攻中場綽綽有餘。其實睇吓美斯嘅獎盃櫃，球會級大賽冠軍幾乎拎過晒，唯一係國家隊交白卷，勉強叫做有塊奧運金牌。明年世界盃阿根廷有好多大熟大勇嘅前鋒，阿古路、希古恩、泰維斯等等，由美斯校炮，威力唔見得減少，確實試得過。文：牽牛
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24