物流S突然打電話嚟問：「你到過河內道K11未？」梗係到過啦，K11係商場名稱，大廈由新世界建造，係市建局產品，賣完住宅大廈「名鑄」之後，市建局賺到盤滿缽滿，商業部份有凱悅酒店與商場，就由新世界全部擁有，酒店西餐廳Hugo傳承自昔日位於今日Square之凱悅酒店，幾好㗎，雖然冇當年咁正。
物流S又問：「咁K11商場嘅停車場呢？」哦，咁就考起，幾次去都係坐地鐵，由地鐵出口行過去，約五分鐘箒，幾方便，駛乜揸車呀？物流S話：「咁就要講俾你聽咯，費事你下次犯上同一錯誤，要去警局解畫，我嘅同行物流B前兩個星期去過，吃飯購物之後，自停車場四樓駛落三樓出口，到四樓出口先拍一次八達通，到咗三樓出口，見到欄桿舉起，佢不以為意，直行直出。點知第二日佢上深圳之時，行到上水就收到公司電話，叫佢速速去尖沙嘴警署落口供，以免犯上官非，佢唯有掉頭駛返九龍到警署，警察笑笑口同佢講述案情，簽份口供就叫佢走返K11付費（停車場費），冇事嘅嘞，警察仲話呢類案已不是第一次，已有幾次先例。物流B大感無奈之餘，折返K11停車場管理處拍卡付款，管理員對佢講：「停車場三樓出口之欄桿可能有事，前車走後，唔肯跌落嚟，於是你隨後直駛出去，同樣事情發生幾次嘅嘞，我哋依程序要報警求助箒。」物流B聽咗就㷫，點解唔修理好三樓停車場之出口問題，變相形成陷阱？管理員話唔係佢工作權力範圍喎。物流S真好心，驚住左丁山下次去K11商場變咗去警局，來電提醒。
K11由鄭裕彤長孫鄭志剛管理，這位哈佛畢業生有意思將K11發展為一個具有藝術市場意味嘅商場品牌，成功後向全國推廣，其志可嘉。講起藝術市場，大家當然想到名畫拍賣，好似好glamorous（光彩），又夠高尚，於是不少富家女兒對該Fine Arts發生興趣，而且仲要讀藝術史（Art History）㖭，最高級者要去法國巴黎嘅高等院校讀，認真巴閉。讀完藝術史可以搵好工，發財？非也，富家女根本就唔駛搵錢，追上高檔潮流啫。