澳門賭場生意越做越旺，就連「萬人迷」碧咸都要去搵銀！碧咸掛靴之後，來亞洲嘅機會好似密過以前，仲不時涉足財經界。繼9月來港參與里昂投資論壇做演講嘉賓之後，今日又會喺澳門亮相，宣佈跟拉斯維加斯金沙集團成為亞洲合作夥伴。
碧咸今日下午將會現身金沙中國（1928）旗下威尼斯人，聽聞佢係跟金沙澳門，同埋金沙新加坡綜合度假村有合作。
金沙密密搞體育賽事
金沙其實都幾積極透過體育運動吸客，今年5月搵來已退役嘅籃球明星姚明，以中國男子籃球職業聯賽（CBA）球隊上海大鯊魚老闆身份，帶領球隊到澳門作賽；近日又舉行大型拳賽，唔知碧咸有冇興趣睇番場先走呢？
澳門賭業開放多年，生意真係越做越旺，今年10月受惠於黃金周，旅客量大增，博彩收入更創新高，達到354億元。金沙中國股價亦不斷上揚，上月高位貼近60元，噚日市值超過4,500億元。
不過話說回來，賭場多數搵名人做表演或者出席活動做嘉賓，好少話簽長期合作，究竟碧咸同金沙點樣做合作夥伴呢？對於碧咸粉絲而言，佢哋點樣合作未必係重點，最緊要係碧咸多啲飛嚟亞洲，就好似佢噚日已經喺上海出席活動喇。
李華華
mailto:[email protected]
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24