【本報訊】昔日利東街老街坊May姐葉美蓉，曾絕食抗議市建局強拆囍帖街，最終一切美麗舊年華，今日變成數百個懸棺式露台在灣仔天空高高掛。她看見就火遮眼，怒斥市建局是「政府成立出嚟嘅一個地產霸權，比私人地產商更無良」，因為發展商要補地價，市建局免補地價收舊樓，卻起豪宅，未惠及基層市民。
批評未惠及基層市民
當年利東街每呎實用面積的收購價為4,079元，今日竟以逾四倍價錢的定價（平均實呎22,753元）開售，記者告知開價後，May姐在電話上鬧爆市建局，「嘩！不過都係估計之中，始終市區地，一步檻落地鐵站……然而政府成立咗一個地產惡霸（市建局）囉！地產霸權，係人都知。私人地產商，我哋無話可以說，但作為政府成立嘅機構，係咪應該有個帶頭作用（協助基層市民）……」。
May姐又指，近年市建局重建項目常令人有賺盡之感，質疑社會是否仍需要市建局的存在，「佢有咁大嘅權利，係咪應該有社會責任，有承擔，令更多基層受惠呢！」她批評，市建局賺到盡，引述早前《鏗鏘集》報道指，灣仔Queen's Cube未重建時，地積比僅三至四倍，重建後可去到10倍，連帶兩成發水，地積比高達12倍，足足賺多十幾倍。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange