網隊俄羅斯富豪班主普羅克豪洛夫，季初豪言唔知咩叫豪華稅，只要球隊拎到總冠軍就得；但呢隊「土豪網隊」今季開季戰績大幅走樣，美國籃球網挑選嘅NBA今季20大高薪低能球員，網隊竟有3人入圍，「過氣鷹王」祖莊遜仲榮登第1位㖭。
祖莊遜居低能榜首
強國網民近期就有潮語「土豪」，意指有錢仔全身都係冇品味名牌衣着，或者狂掃名車名表。NBA今季就有一支土豪球隊，就係總薪酬1億美金嘅網隊，連埋豪華稅，普羅克豪洛夫要用1.8億美金埋單。但喺NBA，有錢唔能夠使得鬼推磨，周三好樣衰咁作客以91:95不敵山貓，開季作客只得1勝6負，只係多過公鹿一場勝仗，唔使排東岸包尾咋。
美國籃球網頁dimemag.com就列舉今季20大高薪低能球員，仲向排No.1嘅祖莊遜盡情抽水；鷹隊當年因為自由市場簽唔到勒邦占士、獲迪等大牌，先死死地氣用6年1.2億美金合約留祖莊遜，但有長約後，祖莊遜嘅表現就逐漸下滑，上季轉投網隊依然故我，作為一個射手，今季3分命中率只得36.4%。祖莊遜周三作客山貓，表現雖已經有好轉，3分9射4中累積19分，但球隊繼續作客輸波。其實網隊仲有兩個入選，就係排第5嘅迪朗威廉士同14位嘅加尼特，迪朗其實鬥心唔太差，衰在今季幾黑仔，剛剛復出冇耐，對山貓又扭傷左足踝，只打得15分鐘。
紐約人冤枉墮「馬」
網隊同紐約人今季真係難兄難弟，紐約人周三主場同溜馬打到加時，以96:103輸波，同網隊都係開季3勝8負；排高薪低能榜第2位嘅紐約人前鋒A史杜達米亞，更未獲教練活臣派上場。不過紐約人今場輸得冤枉，第4節最後5.2秒，森柏就咁企直舉高手，俾溜馬前鋒保羅佐治博到鬼影犯規，入晒3個罰球追至89平手，先有得加時贏埋紐約人。
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24