上市公司間間都吹噓自己業務前景幾咁亮麗。想查證嗎？又唔係個個板塊大家都易了解。零售股目標係街客，想快人一步知道個trend，多啲行街、上網，一眼關七，就知產品夠唔夠入屋，股份係龍定係蛇。
多得「芝華仕」梳化入屋，近一年敏華（1999）越炒越高。菲菲身邊好多朋友屋企，都係用呢個牌子梳化，個個都盛讚物超所值。
最近YY講開，話佢最近去一個住北角半山豪宅朋友屋企，發現呢個極度有米嘅家庭，屋企成2,000幾呎，但竟然都係放「芝華仕」梳化。佢朋友仲盛讚呢張頭等艙系列梳化有幾正，話之後即使要換，都非呢個品牌莫屬。
敏華雖以出口為主，但近年亦拓內地市場。想知受唔受落，單睇光棍節促銷活動，頭等艙系列於天貓定單近6,800萬元，按年增逾1.1倍。歐美經濟復蘇，內地市場進展良好，證明前景真係幾樂觀。
網購乃係大勢所趨，產品受唔受歡迎，上網望一望就知。除咗敏華外，時計寶（2033）光棍節銷售都好強勁，於所有天貓銷售的手錶產品當中，集團手錶的銷售營業額名列當日首位。之前市場擔心內地打貪對呢隻股份有冇影響，今次數字率先反映，中檔錶市場大有作為。股價近日升到呢個水平，短期內或回一回，可候低收集。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange