一提內地科網界，大家多數醒起騰訊（700）老闆馬化騰同埋阿里巴巴創辦人馬雲，其實仲有一位百度老闆李彥宏。大概因為百度喺納斯達克上市，李彥宏唔使在港曝光，大家先至對佢印象模糊。
根據彭博千億富豪指數（Bloomberg Billionaires Index），李彥宏最新身家有119億美元（928億港元），成為中國第二大富豪，僅次於大連萬達王健林，相當巴閉；馬化騰都只係排第四。
李彥宏身家上漲，主要因為百度今年7、8月落實收購網龍（777）旗下91無綫，刺激股價穩步上揚，累升超過50%，李彥宏手持約兩成嘅百度股權，價值因此水漲船高，李彥宏隨即身家暴漲。
唔知李彥宏有冇考慮分拆業務來港上市呢？橫掂港交所（388）CEO李小加度緊橋畀新經濟企業來港上市，百度一定合格喎，到時就可以跟雙馬一較高下。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange