大公司老闆牛一，根據過往慣例擺幾圍宴請至親好友，有份獲邀的公司職員，都是部門主管及屬下頭馬。有得去固然有面子，但最傷腦筋的就是該送甚麼禮！雖然老闆講明不要送，但怎麼好意思帶兩梳蕉出席白食？老闆乜都有又大把錢，根本唔志在，所以要送得體面又貼心，確實是個難題。
阿姐是個剛入職的部門主管，眾部門主管循例邀她一起「夾份」兼商討，問她是否願意加入，阿姐爽快應承，然後問大家老闆識唔識飲紅酒，送支幾千蚊嘅紅酒夠靚啦咁話！
眾主管你眼望我眼，老闆請食飯鮑參翅肚靚酒任飲，幾千蚊是每個人過往夾開的數目。七嘴八舌明示暗示之間碰巧有同事講起有親戚開藥材舖，眾人決定託他買冬蟲草給老闆補補身。埋單計數除開每人千幾蚊，夾錢時阿姐塊面黑過玄壇，眾主管及其他同事都看在眼內，對她為人心中有數。
那晚到場之後阿姐第一時間拉幾個下屬開枱，同事們請她在自製的大生日卡上簽個名，她自顧自埋頭苦幹叫極她都懶理。及後老闆一家到場想請各部門逐一影相留念，她正在打個不亦樂乎，頭也不抬話唔得閒等陣先喎，負責統籌的同事有多無奈兼難做可想而知。
平常各部門各有各做又各忙，大家對這位新來的阿姐認識本來不深，經此一役，大家印象非常深刻，更成為茶餘飯後的話題。初來埗到人生路不熟，應該一眼關七留心留意身邊發生的每件事，盡快和其他部門建立關係，對上對下都要有禮貌夠客氣，而不是擺阿姐款扮大牌指指點點。做得阿姐收入肯定有番咁上下，出手唔該漂亮利落，做人要有量度胸襟還要夠大氣。
這位阿姐的前景，大家點睇？
張慧敏
http://www.facebook.com/HKcareerdoctor
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24