今日推介一隻較冷門嘅零售股慕詩（130），提起呢個品牌，相信大家都會諗起佢哋以前嘅代言人蔡少芬。慕詩主打中檔女裝及配飾，一度為港產時裝品牌嘅主要代表之一，可惜Zara及H&M等過江龍相繼崛起，奪去OL們嘅芳心，慕詩氣勢已大不如前，股價及盈利均拾級而下。講咗咁耐，戰友會以為唐牛想沽空佢，其實不然。經過一輪低潮後，慕詩盈利已悄悄恢復動力，截至今年3月底止，全年盈利2,003萬銀，按年倒退81%，但如果拆開上下半年睇，下半年賺1,616萬銀，按半年大增逾3倍，毛利率按半年亦由82%升至85.2%，反映其品牌優勢依然存在。上星期同屬零售時裝品牌嘅堡獅龍（592），短短三日炒高四成，可見資金對低殘零售股仍虎視眈眈。秤身家，慕詩每股NAV高達2.43元，現價市賬率僅0.65倍，可謂平絕同業，市值4.5億銀中，有2.2億係現金，含金量極高。
另一方面，集團上市以來從不間斷派息，現價息率高達6.3厘，防守力一流。再加少少幻想空間︰而家殼股有價，慕詩業務簡單兼無負債，加上股權集中（大老闆陳欽杰持股近七成），絕對係一隻靚殼，一旦被相中，肯定升到你唔信，趁下周放榜前入場，隨時有意外嘅收穫。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange