港股爆升後現後抽，跟足劇本行事，短暫調整後，結算前有望突破二萬四。個場忽然轉旺，港交所（388）起勢追落後，如日均成交去番800億銀，有條件上番150至160蚊，適合唔多睇市、又想年底發筆小財嘅戰友。
同一個概念、想進取啲有何選擇？財經公關皓天財經（1260）有得諗。做公關搵得幾多錢？細閱業績，原來食水好深！截至9月底止半年，皓天只係「湊大」六隻新股，分部利潤8,013萬銀，這當然包括幫其他客戶出新聞稿、搞業績記招等雜務。
踏入第四季，新股蜂擁而出，近日股市又生猛番哂，勢將吸引更多新股上市。皓天業績披露，齋計近個半月，公司已幫八隻新股掛牌，多過上半年總和，每隻都份量十足，包括重慶行（1963）、雲遊（484）及輝山（6863），收費較高之餘，更奠定其IPO龍頭地位，未來仲有逾廿個客戶排隊上市，加上國際路演業務起飛，下半年業績肯定豬籠入水！
今年3至9月，純利6,309萬銀，按年跌8.2%，但與上一個半年比較反彈15%，反映業績已見底。手握4.2億現金，派息慷慨，現價計逾7厘。牌面睇，下半年增長五成絕不出奇，預測純利1.58億銀，按年增長27%，預測PE僅6.5倍，價值大偏低！突破1.08元追入，10倍PE計，可見1.58元。
魏力
http://www.facebook.com/2012jason
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24