新世界發展（017）噚日舉行股東會，舊年3月正式揸旗嘅鄭家純（純官），似乎唔得股東歡心，皆因決議佢連任董事嘅反對票比例，居然有28%咁多。睇番2009年同2011年彤叔未退下火線時，純官連任董事嘅反對票分別只有4%同3.2%，支持率好高，搞乜短短兩年積聚咁多怨氣？
除咗純官，連帶一班董事都走唔甩，彤叔女婿兼副主席杜惠愷有25%反對票，執董歐德昌、兩位獨董查懋聲同楊秉樑嘅反對票比重介乎23%至29%；反而孫仔鄭志剛受歡迎，連任贊成票有97%。
不過投票呢家嘢，純官點會在乎。佢仲暢談城中熱話「萬千熄機賀台慶」，話自己晚晚都睇電視，除咗新聞台，亦睇三色台；至於睇唔睇台慶，佢話「到時睇吓點啦」。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange